來自非洲橙色參果~

Posted by Anthony 2018/06/11 0 Comment(s)

咦!點解呢款海參係橙色嘅?

等我桃太郎話你知喇!

其實佢並唔係海參,而係最近衝入香港果欄嘅非洲傳統水果——「火參果」

雖然「火參果」個樣睇起呢起晒刺,但其實佢嘅果肉係十分細膩柔軟,可謂是鐵漢柔情啊!

至於佢嘅營養價值亦都相當犀利。單是「鐵質」已經比同等份量嘅車厘子高出4倍,簡直係女士嘅美顏法寶。同時佢豐富嘅「食物纖維」同「維他命C」對腸臟消化及抗氧化十分好,還可以有效咁通便瘦腹添。

但點樣先可以揀到好嘅「火參果」呢?

教精你啦!「火參果」未熟嗰陣係綠色嘅,全熟就係橙色。如果係即場購買最好就預番自己會幾時食,揀番適當嘅成熟程度。另外;要留意一下「火參果」果皮上有無窿,有窿嘅話空氣就會好容易流入果肉之中,令到細菌滋生同加速「火參果」成熟,咁樣就會好快壞架喇。所以要小心注意啊!

(未熟嘅火參果)

「火參果」嘅保存係好簡單,你唔需要放佢入雪櫃,只要「火參果」果身無穿窿,就可以放係常溫環境長達六個月!因為佢係熱帶沙漠生果,你放佢入雪櫃反而會令佢凍傷,凍傷嘅「火參果」果皮呈現褐色嘅斑點,就好似淤咗咁。同時凍傷嘅「火參果」營養價值會大受破壞同時間會快速腐爛,所以千奇千奇唔好亂放「火參果」入雪櫃啊!

你可能會問:咁我想凍食喎可以點做呀?

你可以先將「火參果」對半切開,用匙羹起肉加入少少蜂蜜,再榨汁雪凍,就可以整到杯冰爽好味嘅「火參果」汁。「火參果」肉,仲可以同各種沙律醬混合,撈埋落沙律度食添!

        

食完之後淨番嘅殼,係非洲傳統中會用嚟整成飾物。用少少蜂蜜抹勻係外皮上,風乾之後就可以放係屋企做裝飾架啦!你話係咪好正呢~~!

 

標籤: 火參果