【中秋柚】文旦、沙田柚、泰國三角牌，你又知唔知邊隻啱你食？

Posted by Anthony 2018/09/21 0 Comment(s)

【中秋柚】文旦、沙田柚、泰國三角牌，你又知唔知邊隻啱你食？

一年容易又中秋，香港除咗中意送月餅，其實「柚」都係大熱選擇，但你知唔知點揀柚？就等我「柿子小姐」話你知喇！

中秋既係團圓佳節，亦都係柚子嘅當造時節。所以唔少人都中意中秋食返個柚，喻意團圓又好食！但柚你就聽得多喇，其實香港人主要食中秋柚主要分為三種：

沙田柚

文旦柚

泰國三角牌柚

沙田柚其實唔係真係嚟自香港沙田，而係源自大陸一條名叫「沙田」，出名種柚呢種柚嘅村，而香港人亦習慣叫沙田柚做「碌柚」。
(沙田柚)

沙田柚係柚類之中，算係大隻，而且產地繁多，價格相對廉宜，大約 $1x - $3x，可謂「大件夾抵食」。

但揀一個好嘅沙田柚都唔簡單：優質沙田柚嘅果皮較薄，並有重量感，而且愈重愈好；果肉會較軟同多汁，味甜核少。

如果水分較少，果肉就會帶苦澀味，同有渣，所以記住記住要摸吓個柚，表皮太光滑就代表可能果肉入面無乜水份。

文旦柚，嚟自台灣，又全稱為「麻豆文旦」。據說清朝皇帝嘉慶偶然食到，聽聞文旦喺台南麻豆區限定品種，仲特登去咗台灣食；而登基後，更要求地方官進貢文旦柚，自此「麻豆文旦」就成為學術中柚類的種名之一。

(麻豆文旦)

所以文旦柚來得矜貴，價格相對較貴，約$2x - $4x ，所以揀一個好文旦就更係一種學問。揀文旦柚，最緊要睇佢個下盤，要去除以往「生果愈大愈好」嘅諗法，揀文旦時要套用「不倒翁原則」：建議從細粒嘅落手，揀頭尖、頸短、下盤夠闊嘅文旦柚。頭尖、頸短代表果肉充足皮薄，闊底就代表文旦柚夠成熟，如果發現平放文旦柚後歪斜，就唔好買喇。

食文旦最緊要揀個黃臉婆，夠多皺紋先好買，外皮多皺紋，就代表柚皮嘅水分已經充足吸收到果肉入面，呢個時候食嘅話，會格外多汁又飽滿！

文旦食用上都有個小常識——辭水！

(辭水)