點揀「愛文芒」?就等我菠蘿小太郎話過你知喇!

Posted by Anthony 2018/07/17 0 Comment(s) 購物,

點揀「愛文芒」?就等我菠蘿小太郎話過你知喇!

台灣嘅「愛文芒」紅扑扑,係香港愈來愈受歡迎,賣到成行成市。但係台灣進口嘅「愛文芒」一啲都唔平,要小心揀唔好揀到「壞芒」,揀「靚芒」要留意以下幾點喇!

 

「愛文芒」嚟自台灣,因為佢紅色嘅外皮,而被台灣人稱為「夏日紅寶石」。

首先,揀「愛文芒」,第一件事就係要留意一吓佢嘅外皮。靚嘅「愛文芒」係會有一啲「膠質」嘅汁液「痴」喺「愛文芒」嘅外皮上,代表佢吃落會比較香。

 

其次,我地要聞一聞「愛文芒」有無傳出陣陣嘅果香味,如果無就唔好揀喇。

 

記住記住,千奇唔好揀啲皺皮、有很多黑點、以及壓爛咗嘅「愛文芒」,事關芒果本身係軟皮嘅水果,一旦壓過,令表皮發黑,就意味著佢好大機會已經受到炭疽病菌入侵,唔食得架喇!

 

愛文芒,點先可以擺耐啲?

如果想「愛文芒」可以擺耐啲,唔起黑斑,可以試吓「溫湯處理」。由於鍾意寄生喺芒果嘅炭疽病菌(即係形成黑斑嘅兇手)好鍾意係室溫中侵蝕芒果,係室溫擺得耐嘅芒果就好容易出黑斑。

 

最近,台灣就全面採用「溫湯處理」(vapor heat treatment:VHT)去對抗炭疽病菌,只要將芒果放喺50-60度嘅水蒸汽中20-30分鐘,例如放係慢火嘅蒸爐,就可以明顯減少炭疽病菌喇!

 

 

你又可能試過,明明揀到一隻紅噹噹嘅「愛文芒」,但又點解會唔甜嘅?

其實「愛文芒」本身就係紅色嘅,好多人以為曬都紅晒就一定甜到漏。事關「愛文芒」本身比較紅嘅外皮會令一般人以為佢已經好熟,其實佢同一般芒果一樣,最好買返嚟放一兩日等佢再軟身啲,可以撳凹少少、有兩點黑點、變得有啲亮身,就係最甜最好食嘅Timing!

 

最後提點大家,最近市面上亦都出現咗唔少都係紅身嘅芒果,無見開「愛文芒」嘅大家好易混淆,例如:泰國同墨西哥都有出產嘅紅芒,所以唔好以為叫「紅芒」或者係紅色就以為係「愛文芒」喇!

標籤: 愛文芒